ଏ.କେ ବ୍ୟୁରୋ : ଆମେରିକାରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଉପରେ ହୋଇଥିବା ଆକ୍ରମଣ ଏକ ବଡ଼ ସାର୍ବଜନୀନ ବିତର୍କ ସୃଷ୍ଟି କରିଛି। ଏକ ନୂତନ ସର୍ଭେରୁ ଜଣାପଡ଼ିଛି ଯେ ଅନେକ ଆମେରିକୀୟ ବିଶ୍ୱାସ କରନ୍ତି ଯେ ଟ୍ରମ୍ପଙ୍କ ଉପରେ ହୋଇଥିବା ଆକ୍ରମଣ ମିଥ୍ୟା ଅବା ଯୋଜନାବଦ୍ଧ ହୋଇପାରେ। ସର୍ଭେ ଅନୁଯାୟୀ, ପ୍ରାୟ ଏକ ତୃତୀୟାଂଶ ଆମେରିକୀୟ ବିଶ୍ୱାସ କରନ୍ତି ଯେ ଟ୍ରମ୍ପଙ୍କ ଉପରେ ହୋଇଥିବା ତିନିଟି ଆକ୍ରମଣ ମଧ୍ୟରୁ ଅତି କମରେ ଗୋଟିଏ ଯୋଜନାବଦ୍ଧ ଥିଲା।
ନ୍ୟୁଜଗାର୍ଡ ଏବଂ ୟୁଗଭ ଦ୍ୱାରା କରାଯାଇଥିବା ଏହି ସର୍ଭେରେ ଏପ୍ରିଲ ୨୮ ରୁ ମେ’ ୪ ମଧ୍ୟରେ ୧,୦୦୦ ଆମେରିକୀୟଙ୍କୁ ଏନେଇ ପଚରାଯାଇଥିଲା। ମେ’ ୧୧ ରେ ପ୍ରକାଶିତ ରିପୋର୍ଟରୁ ଏହା ଜଣାପଡିଛି। ସର୍ଭେ ରିପୋର୍ଟ ପ୍ରକାଶ ହେବା ଦିନ ଏହି ମାମଲାର ଅଭିଯୁକ୍ତ କୋଲ୍ ଥମାସ ଆଲେନ୍ କୋର୍ଟରେ ନିଜକୁ ଦୋଷୀ ନୁହେଁ ବୋଲି ସ୍ୱୀକାର କରିଥିଲେ। ତାଙ୍କ ଉପରେ ରାଷ୍ଟ୍ରପତିଙ୍କୁ ହତ୍ୟା ଉଦ୍ୟମ ଏବଂ ଫେଡେରାଲ୍ ଏଜେଣ୍ଟମାନଙ୍କୁ ଆକ୍ରମଣ କରିବା ଭଳି ଅଭିଯୋଗ ରହିଛି। ସର୍ଭେ ଅନୁଯାୟୀ, ୨୪% ଉତ୍ତରଦାତା ଏପ୍ରିଲ ୨୫ ତାରିଖରେ ୱାସିଂଟନ ଡିସିରେ ହ୍ୱାଇଟ୍ ହାଉସ୍ କରେସପଣ୍ଡେଣ୍ଟଙ୍କ ରାତ୍ରୀଭୋଜନ ସମୟରେ ଟ୍ରhttp://ଟ୍ରମ୍ପଙ୍କମ୍ପଙ୍କ ଉପରେ ହୋଇଥିବା ଆକ୍ରମଣକୁ ମିଛ ବୋଲି କହିଥିଲେ।
ଅନ୍ୟପକ୍ଷରେ, ୪୫% ବିଶ୍ୱାସ କରିଥିଲେ ଯେ ଆକ୍ରମଣ ପ୍ରକୃତ ଥିଲା। ପ୍ରାୟ ୩୨% ଲୋକେ ଘଟଣା ବିଷୟରେ ଅନିଶ୍ଚିତ ଥିଲେ। ରିପବ୍ଲିକାନ ଏବଂ ଡେମୋକ୍ରାଟଙ୍କ ମଧ୍ୟରେ ବଡ଼ ପାର୍ଥକ୍ୟ। ଏହି ସର୍ଭେ ରାଜନୈତିକ ଦଳଗୁଡ଼ିକ ମଧ୍ୟରେ ଏକ ଗୁରୁତ୍ୱପୂର୍ଣ୍ଣ ପାର୍ଥକ୍ୟ ମଧ୍ୟ ପ୍ରକାଶ କରିଛି। ପ୍ରାୟ ୩୩% ଡେମୋକ୍ରାଟ କହିଛନ୍ତି ଯେ ଆକ୍ରମଣ ନକଲି ଥିଲା, ଯେତେବେଳେ କେବଳ ୮% ରିପବ୍ଲିକାନ ଏହାକୁ ମିଛ ବୋଲି ବିଶ୍ୱାସ କରନ୍ତି। ନ୍ୟୁଜଗାର୍ଡ ସମ୍ପାଦିକା ସୋଫିଆ ରୁବିନସନ କହିଛନ୍ତି, ସର୍ଭେ ଦର୍ଶାଉଛି ଯେ, ଆମେରିକାର ଲୋକମାନେ ଏଭଳି ଘଟଣା ପରେ ପୂର୍ବ ଅପେକ୍ଷା ସରକାର ଏବଂ ଗଣମାଧ୍ୟମ ଉପରେ କମ୍ ବିଶ୍ୱାସ କରୁଛନ୍ତି। ହ୍ୱାଇଟ୍ ହାଉସ୍ ମୁଖପାତ୍ର ଡେଭିସ୍ ଏଙ୍ଗଲ୍ ଏହି ଦାବିଗୁଡ଼ିକୁ ଖଣ୍ଡନ କରି କହିଛନ୍ତି, ଯେଉଁମାନେ ବିଶ୍ୱାସ କରନ୍ତି ଯେ, ଟ୍ରମ୍ପ ଏହି ଆକ୍ରମଣର ଯୋଜାନ କରିଥିଲେ ସେମାନେ ଭୁଲ୍ କରୁଛନ୍ତି।
ସବୁଠାରୁ ଗୁରୁତର ଆକ୍ରମଣ ଜୁଲାଇ ୨୦୨୪ ରେ ପେନସିଲଭାନିଆର ବଟଲରରେ ଟ୍ରମ୍ପଙ୍କ ଏକ ପ୍ରଚାର ରାଲି ସମୟରେ ଘଟିଥିଲା। ଏକ ଗୁଳି ଟ୍ରମ୍ପଙ୍କ କାନକୁ ବାଜି ଜଣେ ବ୍ୟକ୍ତିଙ୍କ ମୃତ୍ୟୁ କରିଥିଲା। ଏଫ୍ବିଆଇ ଆକ୍ରମଣକାରୀଙ୍କୁ ୨୦ ବର୍ଷୀୟ ଥମାସ ମାଥ୍ୟୁ କ୍ରୁକ୍ସ ଭାବରେ ଚିହ୍ନଟ କରିଥିଲା। ପରେ ସିକ୍ରେଟ୍ ସର୍ଭିସ ଦ୍ୱାରା ତାଙ୍କୁ ଗୁଳି କରି ହତ୍ୟା କରାଯାଇଥିଲା। ସର୍ଭେ ଅନୁଯାୟୀ, ୨୪% ଉତ୍ତରଦାତା ମଧ୍ୟ ପେନସିଲଭାନିଆ ଘଟଣା ନକଲି ବୋଲି ବିଶ୍ୱାସ କରିଥିଲେ । ଏହି ସମୟରେ, ୧୬% ବିଶ୍ୱାସ କରିଥିଲେ ଯେ ସେପ୍ଟେମ୍ବର ୨୦୨୪ରେ ଫ୍ଲୋରିଡାର ୱେଷ୍ଟ ପାମ୍ ବିଚ୍ରେ ଟ୍ରମ୍ପଙ୍କ ଉପରେ ଗଲ୍ଫ କ୍ଲବ୍ ନିକଟରେ ଘଟିଥିବା ଘଟଣା ନକଲି ଥିଲା । ରିପୋର୍ଟରେ ଏହା ମଧ୍ୟ ପ୍ରକାଶ ପାଇଛି ଯେ ୧୮ ରୁ ୨୯ ବର୍ଷ ବୟସର ଯୁବବର୍ଗମାନେ ଟ୍ରମ୍ପଙ୍କ ଉପରେ ଆକ୍ରମଣ ପୂର୍ବ ଯୋଜନାବଦ୍ଧ ବୋଲି ବିଶ୍ୱାସ କରିବାର ସମ୍ଭାବନା ଅନ୍ୟ ବୟସ୍କ ଗୋଷ୍ଠୀଙ୍କ ତୁଳନାରେ ଅଧିକ ରହିଛି ।
