AK ସମୁଦ୍ର ମଝିରେ ‘ଟୋଲ୍ ଗେଟ୍’ ଚିନ୍ତା: ମଲାକା ଷ୍ଟ୍ରେଟ୍ରେ ଟିକସ ଲଗାଇବ ଇଣ୍ଡୋନେସିଆ, ସଙ୍କଟରେ ଭାରତର ! ବିଶ୍ୱର ସବୁଠାରୁ ବ୍ୟସ୍ତବହୁଳ ସାମୁଦ୍ରିକ ପଥ ‘ଷ୍ଟ୍ରେଟ୍ ଅଫ୍ ମଲାକା’ କୁ ନେଇ ଏବେ ଏକ ନୂଆ ବିବାଦ ମୁଣ୍ଡ ଟେକିଛି । ଇଣ୍ଡୋନେସିଆ ଏହି ଗୁରୁତ୍ୱପୂର୍ଣ୍ଣ ଜଳପଥ ଦେଇ ଯାଉଥିବା ଜାହାଜଗୁଡ଼ିକ ଉପରେ ‘ଟୋଲ୍ ଟ୍ୟାକ୍ସ’ ଲଗାଇବାକୁ ଯୋଜନା କରୁଛି । ଯଦି ଏହା କାର୍ଯ୍ୟକାରୀ ହୁଏ, ତେବେ ଭାରତ ସମେତ ଅନେକ ଏସୀୟ ଦେଶର ରପ୍ତାନି ଓ ଆମଦାନୀ ବ୍ୟୟ ବହୁଗୁଣିତ ହେବାର ଆଶଙ୍କା ଦେଖାଦେଇଛି । ଇଣ୍ଡୋନେସିଆର ଅର୍ଥମନ୍ତ୍ରୀ ପୁର୍ବାୟା ଯୁଧି ସଦେଭା ଏହି ପ୍ରସ୍ତାବ ସମ୍ପର୍କରେ ସୂଚନା ଦେଇ କହିଛନ୍ତି ଯେ, ନିଜକୁ ବିଶ୍ୱ ବାଣିଜ୍ୟର ଏକ ଶକ୍ତିଶାଳୀ ଖେଳାଳି ଭାବେ ଗଢ଼ିତୋଳିବା ପାଇଁ ଏଭଳି ପଦକ୍ଷେପ ଉପରେ ଚର୍ଚ୍ଚା ଚାଲିଛି । ସୁଏଜ୍ କେନାଲ୍ କିମ୍ବା ପାନାମା କେନାଲ୍ ଭଳି ମଲାକା ଷ୍ଟ୍ରେଟ୍ ମଧ୍ୟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ବର୍ଷକୁ ହଜାର ହଜାର ଜାହାଜ ଏହି ପଥ ଦେଇ ଯାଉଥିଲେ ବି ଉପକୂଳବର୍ତ୍ତୀ ଦେଶମାନଙ୍କୁ କୌଣସି ଆର୍ଥିକ ଲାଭ ମିଳୁନାହିଁ । ତେଣୁ ଏଠାରେ ଟ୍ୟାକ୍ସ ଲଗାଇବା ଯୁକ୍ତିଯୁକ୍ତ ବୋଲି ସେ ଦର୍ଶାଇଛନ୍ତି ।
ସିଙ୍ଗାପୁରର ତୀବ୍ର ବିରୋଧ : ଇଣ୍ଡୋନେସିଆର ଏହି ପ୍ରସ୍ତାବକୁ ସିଙ୍ଗାପୁର କଡ଼ା ବିରୋଧ କରିଛି । ସିଙ୍ଗାପୁର ବୈଦେଶିକ ମନ୍ତ୍ରୀ ବିଭିୟନ ବାଲାକ୍ରିଷ୍ଣନ ସ୍ପଷ୍ଟ କରିଛନ୍ତି ଯେ, ଏହି ଜଳପଥ ସମସ୍ତଙ୍କ ପାଇଁ ମୁକ୍ତ ଏବଂ ମାଗଣା ରହିବା ଉଚିତ୍ । ସାମୁଦ୍ରିକ ଆଇନ ଅନୁଯାୟୀ, ଏହି ପଥ ଦେଇ ଗମନାଗମନ କରିବା ସମସ୍ତ ଦେଶର ଅଧିକାର । ସିଙ୍ଗାପୁର କୌଣସି ପ୍ରକାରର ଟୋଲ୍ କିମ୍ବା ପ୍ରତିବନ୍ଧକକୁ ସମର୍ଥନ କରିବ ନାହିଁ ।
ଭାରତ ଉପରେ ପଡ଼ିବ କି ପ୍ରଭାବ ? ଭାରତ ପାଇଁ ମଲାକା ଷ୍ଟ୍ରେଟ୍ କେବଳ ଏକ ଜଳପଥ ନୁହେଁ, ବରଂ ଏହା ଦେଶର ‘ଅର୍ଥନୈତିକ ଜୀବନରେଖା’ । ଟୋଲ୍ ଟ୍ୟାକ୍ସ ଲାଗିଲେ ଭାରତ ଅନେକ ସମସ୍ୟାର ସମ୍ମୁଖୀନ ହୋଇପାରେ । ଭାରତର ସମୁଦ୍ର ପଥରେ ହେଉଥିବା ମୋଟ୍ ବାଣିଜ୍ୟର ପ୍ରାୟ ୫୫% ରୁ ୬୦% ଏହି ମଲାକା ଷ୍ଟ୍ରେଟ୍ ଦେଇ ହୋଇଥାଏ । ଏହି ପଥ ଦେଇ ଭାରତକୁ ଏଲଏନଜି, କୋଇଲା, ଇଲେକ୍ଟ୍ରୋନିକ୍ସ ସାମଗ୍ରୀ ଏବଂ ଔଷଧ ତିଆରି ପାଇଁ ଆବଶ୍ୟକ କଞ୍ଚାମାଲ ଆସିଥାଏ । ଟୋଲ୍ ଲାଗିବା ଦ୍ୱାରା ପରିବହନ ଖର୍ଚ୍ଚ ବଢ଼ିବ, ଯାହାଫଳରେ ସାଧାରଣ ଗ୍ରାହକଙ୍କ ଉପରେ ମହଙ୍ଗା ମାଡ଼ ହେବ । ପୂର୍ବ ଏସୀୟ ଦେଶଗୁଡ଼ିକ ସହ ବାଣିଜ୍ୟିକ ସମ୍ପର୍କ ରଖିବା ପାଇଁ ଏହା ଏକମାତ୍ର ସହଜ ପଥ । ଆଣ୍ଡାମାନ ଓ ନିକୋବର ଦ୍ୱୀପପୁଞ୍ଜ ଏହି ପଥର ଅତି ନିକଟରେ ଅବସ୍ଥିତ । ଏଠାରେ କୌଣସି ପ୍ରକାରର ନିୟନ୍ତ୍ରଣ ଭାରତର ସାମରିକ ଓ ରଣନୀତିକ ସ୍ଥିତିକୁ ପ୍ରଭାବିତ କରିପାରେ । ବିଶେଷଜ୍ଞଙ୍କ ମତରେ, ଏହି ଟୋଲ୍ ଲାଗୁ ହେବା ଏତେ ସହଜ ନୁହେଁ । ମଲାକା ଷ୍ଟ୍ରେଟ୍ ଇଣ୍ଡୋନେସିଆ, ମାଲେସିଆ ଓ ସିଙ୍ଗାପୁର ଏହି ତିନୋଟି ଦେଶ ମଧ୍ୟରେ ଅବସ୍ଥିତ । କୌଣସି ବି ନିଷ୍ପତ୍ତି ପାଇଁ ସମସ୍ତଙ୍କ ସହମତି ଜରୁରୀ । ଏହାବ୍ୟତୀତ ବିଶ୍ୱର ବଡ଼ ବଡ଼ ସିପିଂ କମ୍ପାନୀ ଏବଂ ଚୀନ, ଜାପାନ ପରି ଦେଶ ମଧ୍ୟ ଏହାକୁ ବିରୋଧ କରିବେ ।
ମଲାକା ଷ୍ଟ୍ରେଟ୍ କ’ଣ ? ଏହା ହେଉଛି ଭାରତ ମହାସାଗର ଏବଂ ପ୍ରଶାନ୍ତ ମହାସାଗରକୁ ସଂଯୋଗ କରୁଥିବା ଏକ ସଂକୀର୍ଣ୍ଣ ଜଳପଥ । ବିଶ୍ୱର ମୋଟ୍ ସାମୁଦ୍ରିକ ବାଣିଜ୍ୟର ପ୍ରାୟ ୨୫%ରୁ ୪୦% କେବଳ ଏହି ଛୋଟ ପଥ ଦେଇ ଅତିକ୍ରମ କରିଥାଏ । ବର୍ତ୍ତମାନ ପାଇଁ ଏହା କେବଳ ଏକ ପ୍ରସ୍ତାବ ସ୍ତରରେ ଅଛି । କିନ୍ତୁ, ଭାରତ ପାଇଁ ଏହା ସତର୍କ ହେବାର ସମୟ । ଆଗାମୀ ଦିନରେ ଯଦି ଭୂ-ରାଜନୀତିରେ ପରିବର୍ତ୍ତନ ଆସେ, ତେବେ ସମୁଦ୍ର ପଥରେ ଏହି ‘ଟୋଲ୍ ବୁଥ୍’ ଏସିଆର ଅର୍ଥନୀତିକୁ ଓଲଟପାଲଟ କରିଦେବାର କ୍ଷମତା ରଖୁଛି ।
