ଏ.କେ ବ୍ୟୁରୋ : ଚଳିତ ବର୍ଷ ମେ ୩ରେ ଭାରତରେ ଡାକ୍ତରୀ ପେଶାର ଏକମାତ୍ର ପ୍ରବେଶ ଦ୍ୱାର NEET-UG ପରୀକ୍ଷା ଦେଇଥିଲେ ୨୩ ଲକ୍ଷ ଛାତ୍ର-ଛାତ୍ରୀ। ଏହାର କିଛି ଦିନ ପରେ ଜାତୀୟ ପରୀକ୍ଷା ଏଜେନ୍ସି (NTA) ପରୀକ୍ଷା ବାତିଲ୍ କରିଦେଲା, ମାମଲାକୁ ସିବିଆଇକୁ ପଠାଇଲା ଓ ନିଜର ପରିଚିତ ବିବୃତିରେ ସ୍ୱଚ୍ଛତା ଓ ବିଶ୍ୱାସ କଥା କହିଲା।
ଭାରତ ସମାନ ସ୍ଥାନରେ ଠିକ୍ ଦୁଇ ବର୍ଷ ପୂର୍ବେ ଥିଲା। ଭାଷା ସମାନ, କ୍ଷମା ପ୍ରାର୍ଥନା ସମାନ ଓ ପ୍ରତିଶ୍ରୁତି ବି ସମାନ। କେବଳ ବର୍ଷ ବଦଳିଛି। ଏହା ଅଯୋଗ୍ୟତା ନୁହେଁ, ବରଂ ବାରମ୍ବାର ଅଯୋଗ୍ୟତାର ଯଦି ସଂଶୋଧନ ନ ହୁଏ ତାହା ଗୋଟିଏ ପ୍ରଣାଳୀରେ ପରିଣତ ହୋଇଯାଏ। ଭାରତର ପରୀକ୍ଷା ପରିଚାଳନା ଏବେ ଏମିତି ଏକ ପ୍ରଣାଳୀ ହୋଇଯାଇଛି ଯାହା ବଡ଼ ବ୍ୟାଘାତର ସାମ୍ନା କରେ, ଆକ୍ରୋଶର ଶିକାର ହୁଏ ଓ ପୁଣି ପୁରୁଣା ସ୍ଥିତିକୁ ଫେରି ଆସେ।
୨୦୨୪ ମେ ୫ ତାରିଖରେ NEET-UG ପ୍ରଶ୍ନପତ୍ର ଲିକ୍ ଅଭିଯୋଗ ହୋଇଥିଲା। ବିହାରର ପଟନାରେ ପୁଲିସ୍ ୧୩ ଜଣଙ୍କୁ ଗିରଫ କରିଥିଲା। ଏମାନଙ୍କ ମଧ୍ୟରେ ଥିଲେ ଚାରି ଜଣ ପରୀକ୍ଷାର୍ଥୀ। ସେମାନେ ପ୍ରଶ୍ନପତ୍ର ପାଇବା ପାଇଁ ୩୦-୫୦ ଲକ୍ଷ ଦେଇଥିବା ଅଭିଯୋଗ ହୋଇଥିଲା।
ଅନିୟମିତତାର ଆକାର କେବଳ ଲିକ୍ ମଧ୍ୟରେ ସୀମିତ ନଥିଲା। ମୋଟ୍ ୬୭ ଜଣ ଛାତ୍ର ପୂର୍ଣ୍ଣ ନମ୍ବର (୭୨୦) ପାଇଥିଲେ। ଏହା ପୂର୍ବ ବର୍ଷଗୁଡ଼ିକ ତୁଳନାରେ ବହୁତ ଅଧିକ ଥିଲା। ଏହାକୁ ନେଇ ଆରମ୍ଭ ହୋଇଥିଲା ବିବାଦ।
କେତେକ ଶିକ୍ଷାର୍ଥୀ ୭୧୮ କିମ୍ବା ୭୧୯ ନମ୍ବର ପାଇଥିବାରୁ ପରୀକ୍ଷାର ମାର୍କିଙ୍ଗ୍ ନିୟମ ଉପରେ ବି ପ୍ରଶ୍ନ ଉଠିଥିଲା। ୨୦୨୪ ଜୁନ୍ ୨୨ ତାରିଖରେ କେନ୍ଦ୍ର ସରକାର NTA ମହାନିର୍ଦ୍ଦେଶକ ସୁବୋଧ କୁମାର ସିଂହଙ୍କୁ ପଦରୁ ହଟାଇଥିଲେ। ମାମଲା ସିବିଆଇକୁ ଦେଇଥିଲେ। ଏହାକୁ ସେତେବେଳେ ଦୃଢ଼ ପଦକ୍ଷେପ ବୋଲି କୁହାଯାଇଥିଲା। କିନ୍ତୁ ବାସ୍ତବରେ ଏହା ଗୋଟିଏ ଖେଳ ଛଡ଼ା ଆଉ କିଛି ନଥିଲା।
ସିବିଆଇ ଯାଞ୍ଚ ବେଳେ ଲିକର କାରିଗରୀ ସ୍ପଷ୍ଟ ହୋଇଥିଲା। ହଜାରିବାଗ୍ର ଓଏସିସ୍ ପବ୍ଲିକ୍ ସ୍କୁଲର କେନ୍ଦ୍ରୀୟ ସୁପରିଣ୍ଟେଣ୍ଡେଣ୍ଟ ଷ୍ଟ୍ରଙ୍ଗ୍ ରୁମ୍ (ଯେଉଁଠାରେ ପ୍ରଶ୍ନପତ୍ର ସଂରକ୍ଷିତ ଥିଲା)ର ପଛ ଦ୍ୱାରା ଖୋଲା ଛାଡ଼ିଥିଲେ। ସକାଳ ୮.୦୨ରେ ଅଭିଯୁକ୍ତମାନେ ଟୁଲ୍କିଟ୍ ସହିତ ପ୍ରବେଶ କରି ଲକର୍ ଖୋଲି, ସିଲ୍ ଭାଙ୍ଗି ପ୍ରଶ୍ନପତ୍ରର ଫଟୋ ଉଠାଇଥିଲେ।
କୌଣସି ସ୍ୟାଟେଲାଇଟ୍ ହ୍ୟାକିଙ୍ଗ୍ ନୁହେଁ, କୌଣସି ଉନ୍ନତ ଟେକ୍ନୋଲୋଜି ନୁହେଁ ବରଂ କେବଳ ଏକ ସ୍କ୍ରୁଡ୍ରାଇଭର୍ ଦ୍ୱାରା ସବୁ କିଛି କରି ଦେଇଥିଲେ। ୨୦୨୪ରେ ଭାରତର ଡାକ୍ତରୀ ପ୍ରବେଶ ପରୀକ୍ଷା ଗୋଟିଏ ସ୍କ୍ରୁଡ୍ରାଇଭର୍ ଆଗରେ ହାରିଯାଇଥିଲା। ସିବିଆଇ ମୋଟ ୩୬ ଜଣଙ୍କୁ ଗିରଫ କରିଥିଲା। ୨୦୨୪ ଜୁଲାଇ ୨୩ ତାରିଖରେ ସୁପ୍ରିମ୍ କୋର୍ଟ କହିଥିଲେ ଯେ ପ୍ରଶ୍ନପତ୍ର ଲିକ୍ ହୋଇଥିଲା ସତ। କିନ୍ତୁ ଏହାଦ୍ୱାରା ୧୫୫ ଜଣ ସିଧାସଳଖ ଲାଭ ପାଇଥିଲେ।
ଏହା ସମଗ୍ର ପରୀକ୍ଷାକୁ ପ୍ରଭାବିତ କରିବା ପାଇଁ ପର୍ଯ୍ୟାୟରେ ନଥିଲା। ଏହି କାରଣରୁ ପରୀକ୍ଷା ବାତିଲ୍ ହୋଇ ନଥିଲା। କାଉନ୍ସେଲିଙ୍ଗ୍ ଚାଲିଥିଲା। ସଙ୍କଟ ବେଶ ଭଲ ଭାବେ ମ୍ୟାନେଜ କରାଯାଇଥିଲା।
୨୦୨୪ ଜୁନ୍ ମାସର ସିବିଆଇ ଯାଞ୍ଚ ପରେ ଗିରଫଦାରୀ ହୋଇଥିଲା। ୨୦୨୪ ଜୁଲାଇ ୧୮ ସୁଦ୍ଧା ସିବିଆଇ ପାଟନା ଏମ୍ସର ୪ ଜଣ ଏମବିବିଏସ୍ ଛାତ୍ର ଓ ଜାମସେଦପୁର ଏନଆଇଟିର ଜଣେ ସିଭିଲ ଇଞ୍ଜିନିୟରିଂ ଛାତ୍ରଙ୍କୁ ବାନ୍ଧି ଥିଲା। ଗିରଫଦାରୀ ସଂଖ୍ୟା ୩୬ରେ ପହଞ୍ଚିଛି। କିନ୍ତୁ ଗିରଫ ହେବା ଓ ଦଣ୍ଡିତ ହେବା ଗୋଟିଏ କଥା ନୁହେଁ। ଆଜି ପର୍ଯ୍ୟନ୍ତ NEET ୨୦୨୪ ମାମଲାରେ କୌଣସି ସାର୍ବଜନିକ ରିପୋର୍ଟରେ ଦଣ୍ଡାଦେଶ ସମ୍ପର୍କରେ କିଛି ବି କୁହାଯାଇ ନାହିଁ।
ସିଣ୍ଡିକେଟ୍ ମଡେଲ୍ ଏବେ ବି ଅକ୍ଷତ ରହିଛି। ୨୦୨୫ରେ ସିବିଆଇ ଗୋଟିଏ ୮୭.୫ ଲକ୍ଷ ଟଙ୍କାର NEET ସ୍କାମର ପର୍ଦ୍ଦାଫାସ କରିଥିଲା। ଏହା ପ୍ରମାଣ କରୁଛି ଯେ ସିଣ୍ଡିକେଟ୍ କେବଳ ନିଜକୁ ପୁନଃ ରୂପରେ ଗଢ଼ି ତୋଳିଛନ୍ତି। ଏବେ ୨୦୨୬ରେ ପୁଣି ସେହି ଘଟଣା। ବାତିଲ୍, ସିବିଆଇ ତଦନ୍ତ ଓ ସହଯୋଗର ପ୍ରତିଶ୍ରୁତି। ସମୟ ବଦଳିଛି। କିନ୍ତୁ ସ୍ଥିତି ସମାନ ରହିଛି।
ପବ୍ଲିକ୍ ଏକଜାମିନେସନ୍ସ (ପ୍ରିଭେନ୍ସନ୍ ଅଫ୍ ଅନଫେୟାର୍ ମିନ୍ସ) ଆକ୍ଟ, ୨୦୨୪ ଫେବୃଆରୀ ୯ ତାରିଖରେ ସଂସଦରେ ପାରିତ ହୋଇ ଫେବୃଆରୀ ୧୨ ତାରିଖରେ ରାଷ୍ଟ୍ରପତିଙ୍କ ଅନୁମୋଦନ ଲାଭ କରିଥିଲା। ଏହାକୁ ଭାରତ ପାଇଁ ଆଦର୍ଶ ଆଇନ୍ ବୋଲି କୁହାଯାଉଥିଲା। କିନ୍ତୁ ଏହା କେବଳ କାଗଜରେ ଶକ୍ତିଶାଳୀ। ଆଇନ୍ କାର୍ଯ୍ୟକାରୀ ହେବାର ଦୁଇ ବର୍ଷ ପରେ ମଧ୍ୟ ୨୦୨୬ NEET ପ୍ରଶ୍ନପତ୍ର ଲିକ୍ ହେବାରୁ ବାତିଲ୍ ହୋଇଛି। ଆଇନ୍ ଅଛି, କିନ୍ତୁ କାର୍ଯ୍ୟକାରିତା ନାହିଁ।
NTA ୨୦୧୭ରେ ସ୍ଥାପିତ ହୋଇଥିଲା ଯାହା ଏକ ସ୍ୱାଧୀନ, ବୃତ୍ତିଗତ ଏବଂ ଟେକ୍ନୋଲୋଜି-ଚାଳିତ ପରୀକ୍ଷା ସଂସ୍ଥା ହେବାର ଥିଲା। କିନ୍ତୁ ଏହା କି ପ୍ରକାରର କାର୍ଯ୍ୟ କରୁଛି, ସେକଥା ସମସ୍ତଙ୍କୁ ଜଣା।
