ଚେନ୍ନାଇ, ଏ.କେ ବ୍ୟୁରୋ : ତାମିଲନାଡ଼ୁ ରାଜନୀତିରୁ ଏହି ସମୟର ସବୁଠାରୁ ବଡ଼ ଏବଂ ଚମକାଇଦେଲା ଭଳି ଖବର ସାମ୍ନାକୁ ଆସୁଛି । ନିକଟରେ ରାଜ୍ୟର ନୂଆ ମୁଖ୍ୟମନ୍ତ୍ରୀ ଭାବେ ଶପଥ ନେଇଥିବା ସୁପରଷ୍ଟାର ଥଲାପତି ବିଜୟଙ୍କ ସରକାର ଉପରେ ସଙ୍କଟର କଳାବାଦଲ ମାଡ଼ି ଆସିଛି । ବିଧାନସଭା ନିର୍ବାଚନରେ ପୂର୍ଣ୍ଣ ବହୁମତ ପାଇବାରୁ ବଞ୍ଚିତ ହେବା ପରେ ଏବଂ ସହଯୋଗୀଙ୍କ ବଳରେ ଗଠନ ହୋଇଥିବା ‘ତାମିଲଗା ଭେତ୍ରି କାଜାଗାମ’ (ଟିଭିକେ) ସରକାରଙ୍କୁ ଏବେ ନିଜ ଲୋକଙ୍କଠାରୁ ହିଁ ଶକ୍ତ ଧକ୍କା ଲାଗିଛି । ସରକାରରେ ସାମିଲ ଥିବା ବାମପନ୍ଥୀ ଦଳ ମାକପା (CPI-M) ମୁଖ୍ୟମନ୍ତ୍ରୀ ବିଜୟଙ୍କୁ ଅତି କଡ଼ା ଭାଷାରେ ଚେତାବନୀ ଦେଇଛି । ଏହି ଚେତାବନୀ ପରେ ରାଜ୍ୟର ରାଜନୈତିକ କରିଡରରେ ଗୋଟିଏ ପ୍ରଶ୍ନ ଉଠୁଛି- ବିଜୟ ନିଜ ମୁଖ୍ୟମନ୍ତ୍ରୀ ଚେୟାର ବଞ୍ଚାଇ ପାରିବେ ତ ?
ସରକାରରେ ବିବାଦର ଅସଲ କାରଣ କ’ଣ ?
ମିଳିଥିବା ସୂଚନା ଅନୁଯାୟୀ, ଏହି ସମଗ୍ର ବିବାଦର ମୂଳ କାରଣ ହେଉଛି ବିରୋଧୀ ଦଳ AIADMK କୁ କ୍ୟାବିନେଟ୍ରେ ସାମିଲ କରିବା ନେଇ ଚାଲିଥିବା ଚର୍ଚ୍ଚା । ବିଧାନସଭା ନିର୍ବାଚନରେ ବିଜୟଙ୍କ ଦଳ ଟିଭିକେ ୧୦୮ଟି ଆସନ ଜିତିଥିଲା, ଯାହା ବହୁମତ ସଂଖ୍ୟା (୧୧୭) ଠାରୁ ୧୦ଟି କମ୍ ଥିଲା । ଏହା ପରେ କଂଗ୍ରେସ, ବାମପନ୍ଥୀ ଏବଂ ଅନ୍ୟାନ୍ୟ ଦଳର ସହଯୋଗରେ ସରକାର ଗଠନ ହୋଇଥିଲା । କିନ୍ତୁ ଏବେ ଖବର ଆସୁଛି ଯେ AIADMK ର ଗୋଟିଏ ଗୋଷ୍ଠୀକୁ ସରକାରରେ ମନ୍ତ୍ରୀ ପଦ ଦିଆଯାଇପାରେ, ଯାହାକୁ ନେଇ ବାମପନ୍ଥୀ ଦଳଗୁଡ଼ିକ ପ୍ରତିବାଦର ନିଆଁ ବର୍ଷୁଛନ୍ତି ।
ମାକପାର ରାଜ୍ୟ ସମ୍ପାଦକ ପି. ଶନମୁଗମ ସ୍ପଷ୍ଟ ଭାବେ କହିଛନ୍ତି ଯେ, “ଯଦି ମୁଖ୍ୟମନ୍ତ୍ରୀ ବିଜୟ AIADMK କୁ କ୍ୟାବିନେଟ୍ରେ ସ୍ଥାନ ଦିଅନ୍ତି, ତେବେ ଆମ ଦଳ ସରକାରଙ୍କୁ ଦିଆଯାଉଥିବା ସମର୍ଥନ ଉପରେ ପୁନର୍ବିଚାର କରିବ ।” ଶନମୁଗମ ଗଣମାଧ୍ୟମକୁ କହିଛନ୍ତି ଯେ ଆମେ ଆଶା କରୁଛୁ ମୁଖ୍ୟମନ୍ତ୍ରୀ ଏଭଳି ଆତ୍ମଘାତୀ ନିଷ୍ପତ୍ତି ନେବେ ନାହିଁ, କିନ୍ତୁ ଯଦି ସେ ବିରୋଧୀ ଦଳକୁ ସରକାରକୁ ଆଣନ୍ତି, ତେବେ ଆମ ପାଇଁ ଏକାଠି ଚାଲିବା ଅସମ୍ଭବ ହୋଇପଡ଼ିବ ।
AIADMK କୁ ସରକାରରେ ସାମିଲ କଲେ ବାମପନ୍ଥୀ ଦଳ ସମର୍ଥନ ପ୍ରତ୍ୟାହାର କରିବେ ।” ତାମିଲନାଡ଼ୁ ବିଧାନସଭାରେ ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟ ୧୪୪ ଜଣ ବିଧାୟକଙ୍କ ସମର୍ଥନରେ ଆସ୍ଥା ଭୋଟ୍ ଜିତିଥିଲେ । ବହୁମତ ପ୍ରମାଣ କରିବା ପାଇଁ ୧୧୭ ଜଣ ବିଧାୟକଙ୍କ ଆବଶ୍ୟକତା ଥିଲା, ଯେଉଁଥିରେ TVK ବ୍ୟତୀତ କଂଗ୍ରେସ, CPI, ମାକପା, IUML ଏବଂ VCK ର ବିଧାୟକ ସାମିଲ ଥିଲେ । କିନ୍ତୁ ପରଦା ପଛର କାହାଣୀ ହେଉଛି AIADMK ଭିତରେ ଚାଲିଥିବା କଳହର ଫାଇଦା ମଧ୍ୟ ବିଜୟଙ୍କୁ ମିଳିଥିଲା, ଯାହା ପରଠାରୁ ଏହି ମେଣ୍ଟ ଏବେ ଟଳମଳ ହେବାରେ ଲାଗିଛି । AIADMK ଭିତରେ ବର୍ତ୍ତମାନ ଏକ ବଡ଼ ଫାଟ ଦେଖିବାକୁ ମିଳୁଛି । ଦଳର ସୋଟାଲ୍ ବିଧାୟକଙ୍କ ମଧ୍ୟରୁ ଏସ୍. ପି. ଭେଲୁମଣି ଏବଂ ସି. ଭି. ଶନମୁଗମଙ୍କ ନେତୃତ୍ୱରେ ୨୫ ଜଣ ବିଧାୟକଙ୍କ ଗୋଷ୍ଠୀ ଫ୍ଲୋର୍ ଟେଷ୍ଟ ସମୟରେ ପରୋକ୍ଷରେ ବିଜୟଙ୍କ TVK କୁ ସମର୍ଥନ କରିଥିଲେ । ଅନ୍ୟପକ୍ଷରେ, ଦଳର ମୁଖ୍ୟ ଏଡାପ୍ପାଡି କେ. ପଲାନିସ୍ୱାମୀଙ୍କ ଅନୁଗତ ବାକି ୨୨ ଜଣ ବିଧାୟକ ଏହି ଫ୍ଲୋର୍ ଟେଷ୍ଟକୁ ଖୋଲାଖୋଲି ବିରୋଧ କରିଥିଲେ ।
ବାମପନ୍ଥୀ ଏବଂ AIADMK ମଧ୍ୟରେ ବୈଚାରିକ ମତଭେଦ ବହୁତ ପୁରୁଣା ଏବଂ ଗଭୀର । ମାକପା ଏବଂ ଅନ୍ୟାନ୍ୟ ବାମପନ୍ଥୀ ଦଳ ସର୍ବଦା AIADMK କୁ ସମାଲୋଚନା କରିଆସୁଛନ୍ତି, କାରଣ ଏହାର ସମ୍ପର୍କ ବିଜେପି ସହିତ ରହିଆସିଛି । କେନ୍ଦ୍ରର ଏନଡିଏ ସରକାରଙ୍କ ନୀତିକୁ ସମର୍ଥନ କରୁଥିବାରୁ ଲେଫ୍ଟ ପାର୍ଟିଗୁଡ଼ିକ AIADMK କୁ ଆଦୌ ପସନ୍ଦ କରନ୍ତି ନାହିଁ, ଏହି କାରଣରୁ ସେମାନେ ସରକାରରେ ଏହାର ଏଣ୍ଟ୍ରିକୁ ଜୋରଦାର ବିରୋଧ କରୁଛନ୍ତି ।
ବାଜିରେ ଲାଗିଛି କି ବିଜୟଙ୍କ ଗାଦି ?
ଏବେ ସମସ୍ତ ନଜର ମୁଖ୍ୟମନ୍ତ୍ରୀ ସି. ଜୋସେଫ୍ ବିଜୟଙ୍କ ନିଷ୍ପତ୍ତି ଉପରେ ଅଟକି ରହିଛି । ଯଦି ସେ ସରକାରକୁ ଶକ୍ତିଶାଳୀ କରିବା ପାଇଁ AIADMK ର ବିଦ୍ରୋହୀ ଗୋଷ୍ଠୀକୁ ମନ୍ତ୍ରୀ ପଦ ଦିଅନ୍ତି, ତେବେ ବାମପନ୍ଥୀ ସରକାରରୁ ବାହାରିଯିବ । ଯଦିଓ ବାମପନ୍ଥୀ ବାହାରିଯିବା ପରେ ମଧ୍ୟ AIADMK ର ୨୫ ଜଣ ବିଧାୟକଙ୍କ ବଳରେ ବିଜୟଙ୍କ ସରକାର ସୁରକ୍ଷିତ ରହିପାରିବ, କିନ୍ତୁ ଶାସନର ପ୍ରାରମ୍ଭିକ ଦିନରେ ହିଁ ସହଯୋଗୀମାନେ ଏଭଳି ବିଦ୍ରୋହ କରିବା ବିଜୟଙ୍କ ରାଜନୈତିକ ପରିପକ୍ୱତା ପାଇଁ ଏକ ବଡ଼ ପରୀକ୍ଷା ବୋଲି କୁହାଯାଉଛି ।
