ଏ.କେ ବ୍ୟୁରୋ : ଆମେରିକା ଆକ୍ରମଣର ଭୟ ମଧ୍ୟରେ କ୍ୟୁବାରେ ପ୍ରସ୍ତୁତି ଚାଲିଛି। ସମ୍ପ୍ରତି କ୍ୟୁବାବାସୀଙ୍କ ମଧ୍ୟରେ ଏକ ସାଧାରଣ କଥା ହେଉଛି, ଯେତେବେଳେ ଆମେରିକୀୟମାନେ ଆସିବେ’। ଆମେରିକୀୟ ଆକ୍ରମଣର ସମ୍ଭାବ୍ୟ ଭୟ ଦୈନନ୍ଦିନ ଜୀବନରେ ଅନୁଭବ କରାଯାଇପାରୁଛି । ଆମେରିକା ଦେଶ ଉପରେ ପ୍ରତିବନ୍ଧକ ଜାରି କରିଛି, ଯାହା ଫଳରେ ଘୋର ବିଦ୍ୟୁତ୍ ବିଭ୍ରାଟ ହେଉଛି। ପ୍ରାୟତଃ ୨୦ ରୁ ୨୨ ଘଣ୍ଟା ପାଇଁ ବିନା ବିଦ୍ୟୁତ୍ରେ ଲୋକେ ରହୁଛନ୍ତି । ଦେଶ ଏକ ଆର୍ଥିକ ସଙ୍କଟରେ ବୁଡ଼ି ରହିଛି। ଯଦିଓ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପ୍ରଶାସନ ଏପର୍ଯ୍ୟନ୍ତ କ୍ୟୁବା ଆକ୍ରମଣ ବିଷୟରେ କୌଣସି ନିର୍ଦ୍ଦିଷ୍ଟ ବିବୃତି ଦେଇନାହାନ୍ତି। ତେବେ ଖୁବ୍ ଶୀଘ୍ର ଆମେରିକା ଆକ୍ରମଣ ହୋଇପାରେ ବୋଲି ସୂଚନା ମିଳିଛି।
ଆମେରିକାର କେନ୍ଦ୍ରୀୟ ଗୁପ୍ତଚର ସଂସ୍ଥା(ସିଆଇଏ)ନିର୍ଦ୍ଦେଶକ ଜନ୍ ରାଟକ୍ଲିଫ୍ ଗତ ସପ୍ତାହରେ କ୍ୟୁବାର ରାଜଧାନୀ ହାଭାନାରେ ପହଞ୍ଚିଥିଲେ।ଯଦିଓ ତାଙ୍କର ଗସ୍ତ ସାଧାରଣତଃ ଲୋ-ପ୍ରୋଫାଇଲ୍ ଥିଲା ତେବେ,ହାଭାନା ଗସ୍ତ ସମୟରେ ତାଙ୍କ ବିମାନରେ ‘ଯୁକ୍ତରାଷ୍ଟ୍ର ଆମେରିକା’ ସ୍ପଷ୍ଟ ଭାବରେ ଲେଖାଥିଲା। ଏହା ଏକ ଗୁପ୍ତ ଗସ୍ତ ମଧ୍ୟ ନଥିଲା। ଏହା ଅନେକ କ୍ୟୁବାବାସୀଙ୍କ ପାଇଁ ଆଶ୍ଚର୍ଯ୍ୟଜନକ ଥିଲା । ଏହା ଏପର୍ଯ୍ୟନ୍ତ ସ୍ପଷ୍ଟ ସଙ୍କେତ ଯେ ଉତ୍ତେଜନା ଶୀର୍ଷରେ ପହଞ୍ଚିଛି। ଇରାନ ପରି କ୍ୟୁବା ମଧ୍ୟ ଆମେରିକାକୁ ଏକ ‘ଦୁଷ୍ଟ ସାମ୍ରାଜ୍ୟ’ ବୋଲି ବିବେଚନା କରେ। ସିଆଇଏ ୧୯୬୦ ମସିହାରେ ପ୍ରସିଦ୍ଧ ନେତା ଫିଡେଲ କାଷ୍ଟ୍ରୋଙ୍କୁ ହତ୍ୟା କରିବା ପାଇଁ ବିସ୍ଫୋରଣକାରୀ ସିଗାର ଏବଂ ବିଷାକ୍ତ ସ୍କୁବା ସୁଟ୍ ଭଳି ଷଡ଼ଯନ୍ତ୍ର ରଚନା କରିଥିଲା। ସିଆଇଏକୁ କ୍ୟୁବା ଲୋକେ ‘ସୈତାନ’ ବୋଲି ବିବେଚନା କରିଥାନ୍ତି। ତେଣୁ, ସିଆଇଏ ମୁଖ୍ୟଙ୍କ ଗସ୍ତ ନେଇ ଲୋକେ ଆଶ୍ଚର୍ଯ୍ୟ ହୋଇଯାଇଥିଲେ ।
ଶୀତଯୁଦ୍ଧ ସମୟରେ ଆମେରିକା ଏବଂ ରୁଷ ମଧ୍ୟରେ କ୍ୟୁବା ଉତ୍ତେଜନାର କେନ୍ଦ୍ରରେ ଥିଲା। ସେହି ସମୟ ମଧ୍ୟରେ ସିଆଇଏ କ୍ୟୁବାରେ ଶହ ଶହ ଗୁପ୍ତ ଅପରେସନ କରିଥିଲା, ଏବଂ ଆଜି, ଦେଶରେ ସିଆଇଏର କୁଖ୍ୟାତ କାରନାମା ପାଇଁ ଉତ୍ସର୍ଗୀକୃତ ଏକ ସଂଗ୍ରହାଳୟ ଅଛି। କ୍ୟୁବାର ରାଷ୍ଟ୍ରପତି ମିଗୁଏଲ ଡିଆଜ-କାନେଲ ଶ୍ରମିକ ଦିବସରେ ଘୋଷଣା କରିଥିଲେ, ଆମେ ପ୍ରସ୍ତୁତ। ମୁଁ ଏହା ସମ୍ପୂର୍ଣ୍ଣ ଦୃଢ଼ତାର ସହିତ କହୁଛି। ଆମେ ବିପ୍ଳବ ପାଇଁ ଆମର ଜୀବନ ମଧ୍ୟ ଦେବୁ। କ୍ୟୁବାର ସରକାରୀ ଗଣମାଧ୍ୟମ ସାମରିକ ତାଲିମ ନେଉଥିବା ସାଧାରଣ ନାଗରିକଙ୍କ ଫଟୋଗ୍ରାଫ ପ୍ରକାଶ କରିଛି। ଏହା ସମଗ୍ର ଜନସଂଖ୍ୟାର ଯୁଦ୍ଧ। ସରକାର ସାଧାରଣ ନାଗରିକଙ୍କୁ ମଧ୍ୟ ସଶସ୍ତ୍ର କରିଛନ୍ତି ଏବଂ ଏକ ବଡ଼ ଧରଣର ଗରିଲା ଯୁଦ୍ଧ ପାଇଁ ପ୍ରସ୍ତୁତି କରୁଛନ୍ତି। ସରକାର ସାଧାରଣ ନାଗରିକଙ୍କ ଘରଗୁଡ଼ିକର ନିୟନ୍ତ୍ରଣ ନିଜ ହାତରେ ନେଇଛନ୍ତି, ଯାହାକୁ ଯୁଦ୍ଧ ସମୟରେ ଗରିଲା ଯୁଦ୍ଧ ପାଇଁ ବ୍ୟବହାର କରାଯାଇପାରିବ। କ୍ୟୁବାର ପ୍ରସ୍ତୁତି ଭିଏତନାମ-ଶୈଳୀର ଗରିଲା ଯୁଦ୍ଧ ଉପରେ ଆଧାରିତ ହୋଇଛି। ତେବେ କ୍ୟୁବା ସୈନିକଙ୍କ ହାତରେ ଥିବା ଅସ୍ତ୍ରଶସ୍ତ୍ର ସେମାନଙ୍କ ବୟସଠାରୁ ବହୁ ପୁରୁଣା। ସେଗୁଡ଼ିକ ସୋଭିଏତ୍ ଯୁଗର। କ୍ୟୁବା ସେନାର ଆଧୁନିକ ଅସ୍ତ୍ରଶସ୍ତ୍ରର ଅଭାବ ସତ୍ତ୍ୱେ, ସାମରିକ ଇତିହାସକାର ହାଲ୍ କ୍ଲେପାକ୍ କହିଛନ୍ତି ଯେ, ଦ୍ୱୀପର ସାମରିକ ବାହିନୀ ଆମେରିକାର ସ୍ଥଳ ଆକ୍ରମଣକୁ ସହ୍ୟ କରିପାରିବ। ପ୍ରାକୃତିକ ବିପର୍ଯ୍ୟୟ ସମୟରେ ଆମେ ବାରମ୍ବାର ଦେଖିଛୁ, ସେମାନେ ପ୍ରମାଣ କରିଛନ୍ତି ଯେ, ସେମାନେ ଜନସଂଖ୍ୟାକୁ ଏକତ୍ରିତ କରିବା ଏବଂ ଲୋକମାନଙ୍କୁ ନିରାପଦ ସ୍ଥାନକୁ ସ୍ଥାନାନ୍ତର କରିବାରେ ସମ୍ପୂର୍ଣ୍ଣ ସକ୍ଷମ। ମାତ୍ର ଇରାନ ଯୁଦ୍ଧରେ ସମସ୍ୟାରେ ପଡ଼ିଥିବା ଟ୍ରମ୍ପ କ୍ୟୁବା ଉପରେ ଆକ୍ରମର କରିବେ କି ନାହିଁ ସେନେଇ ମଧ୍ୟ ସନ୍ଦେହ ରହିଛି।
