ଏ.କେ ବ୍ୟୁରୋ : ଶିକ୍ଷାନୁଷ୍ଠାନ କେବଳ ପାଠପଢ଼ା, ପରୀକ୍ଷା ଓ ଡିଗ୍ରୀ ହାସଲ କରିବାର ସ୍ଥାନ ନୁହେଁ। ଏହା ହେଉଛି ଜଣେ ଛାତ୍ରର ଚିନ୍ତାଧାରା, ବ୍ୟକ୍ତିତ୍ୱ, ନେତୃତ୍ୱ ଦକ୍ଷତା ଓ ସାମାଜିକ ଦାୟିତ୍ୱବୋଧ ଗଢ଼ିଉଠିବାର ପ୍ରମୁଖ ମଞ୍ଚ। ଏହି ଦୃଷ୍ଟିରୁ ଛାତ୍ର ସଂସଦ ନିର୍ବାଚନ କେବଳ କ୍ୟାମ୍ପସର ଏକ ନିର୍ବାଚନ ନୁହେଁ, ବରଂ ଗଣତନ୍ତ୍ରକୁ ନିକଟରୁ ଜାଣିବାର ଏକ ଅବସର। ଭୋଟ ଦେବା, ନିଜ ପ୍ରତିନିଧି ବାଛିବା, ମତଭେଦକୁ ସମ୍ମାନ କରିବା ଏବଂ ନିର୍ବାଚନର ଫଳାଫଳକୁ ଗ୍ରହଣ କରିବା ଭଳି ଗଣତାନ୍ତ୍ରିକ ମୂଲ୍ୟବୋଧ ଛାତ୍ର ଜୀବନରୁ ହିଁ ଶିଖାଯାଇପାର ।ଛାତ୍ର ସଂସଦ ନିର୍ବାଚନ ଆସିଲେ କ୍ୟାମ୍ପସର ପରିବେଶରେ ଏକ ନୂଆ ଉତ୍ସାହ ଦେଖାଯାଏ। ପ୍ରାର୍ଥୀମାନେ ସହପାଠୀଙ୍କ ନିକଟକୁ ଯାଇ ନିଜର ଚିନ୍ତାଧାରା, ଯୋଜନା ଓ ପ୍ରତିଶ୍ରୁତି ବିଷୟରେ କହନ୍ତି। 
ଛାତ୍ରମାନେ ମଧ୍ୟ ବିଭିନ୍ନ ପ୍ରାର୍ଥୀଙ୍କ ମତାମତ ଶୁଣି ନିଜ ପ୍ରତିନିଧି ବାଛିବା ପାଇଁ ଆଲୋଚନା କରନ୍ତି। ଏହି ପ୍ରକ୍ରିୟା ଏକ ଛୋଟ ଗଣତାନ୍ତ୍ରିକ ବ୍ୟବସ୍ଥାର ପ୍ରତିଛବି ଭଳି ଲାଗେ। କିନ୍ତୁ ନିର୍ବାଚନର ଅର୍ଥ କେବଳ ପ୍ରଚାର, ସ୍ଲୋଗାନ୍ ଓ ଜିତିବାର ଆକାଂକ୍ଷା ନୁହେଁ। ଏକ ସୁସ୍ଥ ଛାତ୍ର ନିର୍ବାଚନର କେନ୍ଦ୍ରରେ ରହିବା ଦରକାର ଛାତ୍ରଙ୍କ ପ୍ରକୃତ ସମସ୍ୟା। ପାଠାଗାରରେ ପୁସ୍ତକର ଅଭାବ, ଛାତ୍ରାବାସ ସମସ୍ୟା, ପାନୀୟଜଳ, କ୍ୟାଣ୍ଟିନ୍, ଶୌଚାଳୟ, କ୍ୟାମ୍ପସ ପରିମଳ, କ୍ରୀଡ଼ା ସୁବିଧା, ସାଂସ୍କୃତିକ କାର୍ଯ୍ୟକ୍ରମ, କ୍ୟାରିୟର ମାର୍ଗଦର୍ଶନ, ଛାତ୍ରବୃତ୍ତି ଓ ଛାତ୍ରୀଙ୍କ ସୁରକ୍ଷା ଭଳି ବିଷୟ ଉପରେ ପ୍ରାର୍ଥୀମାନେ ନିଜର ମତ ରଖିବା ଆବଶ୍ୟକ। କେବଳ “ଜିତିଲେ ସବୁ ବଦଳାଇଦେବି” ବୋଲି କହିବା ଅପେକ୍ଷା କେଉଁ ସମସ୍ୟାକୁ କିପରି ଉଠାଇବେ ଏବଂ ସମାଧାନ ପାଇଁ କେଉଁ ପଦକ୍ଷେପ ନେବେ, ସେ ବିଷୟରେ ସ୍ପଷ୍ଟ ଯୋଜନା ରଖିବା ଅଧିକ ଗୁରୁତ୍ୱପୂର୍ଣ୍ଣ।ଏଠାରେ ମତଦାତା ଛାତ୍ରଙ୍କ ଭୂମିକା ମଧ୍ୟ ଅତ୍ୟନ୍ତ ବଡ଼। ଗଣତନ୍ତ୍ରରେ ଭୋଟ ଏକ ଅଧିକାର ସହିତ ଏକ ଦାୟିତ୍ୱ ମଧ୍ୟ। ତେଣୁ ଛାତ୍ରମାନେ ବ୍ୟକ୍ତିଗତ ବନ୍ଧୁତ୍ୱ, ଗୋଷ୍ଠୀଚାପ କିମ୍ବା ଭାବନା ଅପେକ୍ଷା ପ୍ରାର୍ଥୀଙ୍କ ଯୋଜନା, ଚିନ୍ତାଧାରା ଓ ଛାତ୍ର ସମସ୍ୟା ପ୍ରତି ତାଙ୍କ ଦୃଷ୍ଟିକୋଣକୁ ବିଚାର କରିବା ଆବଶ୍ୟକ। ଜଣେ ସଚେତନ ମତଦାତା ହିଁ ଏକ ଦାୟିତ୍ୱଶୀଳ ଛାତ୍ର ନେତୃତ୍ୱ ଗଢ଼ିପାରନ୍ତି। ବର୍ତ୍ତମାନ ସମୟରେ ଛାତ୍ର ସଂସଦ ନିର୍ବାଚନରେ ସୋସିଆଲ୍ ମିଡିଆର ପ୍ରଭାବ ମଧ୍ୟ ବଢ଼ିଛି। Facebook, Instagram, WhatsApp ଭଳି ମାଧ୍ୟମରେ ପ୍ରାର୍ଥୀମାନେ ନିଜର ମତାମତ ଓ ପ୍ରଚାର ସନ୍ଦେଶ ଅନେକ ଛାତ୍ରଙ୍କ ନିକଟରେ ଶୀଘ୍ର ପହଞ୍ଚାଇପାରୁଛନ୍ତି।
ଏହା ଯୋଗାଯୋଗକୁ ସହଜ କରିଥିଲେ ମଧ୍ୟ ଏହା ସହିତ ଦାୟିତ୍ୱ ମଧ୍ୟ ଜଡ଼ିତ। ଭୁଲ ଖବର, ଅପମାନଜନକ ମନ୍ତବ୍ୟ, ବ୍ୟକ୍ତିଗତ ଆକ୍ରମଣ ଓ ଉତ୍ତେଜନାମୂଳକ ପୋଷ୍ଟ କ୍ୟାମ୍ପସର ପରିବେଶକୁ ପ୍ରଭାବିତ କରିପାରେ। ତେଣୁ ଡିଜିଟାଲ୍ ପ୍ରଚାରରେ ମଧ୍ୟ ଶିଷ୍ଟାଚାର, ସଂଯମ ଓ ତଥ୍ୟନିଷ୍ଠତା ରହିବା ଆବଶ୍ୟକ।ନିର୍ବାଚନରେ ବିଜୟ ହାସଲ କରିବା ନିଶ୍ଚିତ ଭାବରେ ଏକ ସଫଳତା, କିନ୍ତୁ ବିଜୟ ପରେ ଆରମ୍ଭ ହୁଏ ପ୍ରକୃତ ଦାୟିତ୍ୱ। ନିର୍ବାଚିତ ପ୍ରତିନିଧି କେବଳ ନିଜ ସମର୍ଥକଙ୍କ ପ୍ରତିନିଧି ନୁହେଁ; ସେ ସମଗ୍ର ଛାତ୍ରସମାଜର ପ୍ରତିନିଧି। ତେଣୁ ନିର୍ବାଚନ ପରେ ପ୍ରତିଶ୍ରୁତିକୁ ମନେ ରଖି ଛାତ୍ରଙ୍କ ସମସ୍ୟାକୁ ଉପଯୁକ୍ତ ମଞ୍ଚରେ ଉଠାଇବା ଓ ସମାଧାନ ପାଇଁ ଚେଷ୍ଟା କରିବା ତାଙ୍କର ଦାୟିତ୍ୱ। ସେହିପରି ନିର୍ବାଚନରେ ପରାଜିତ ପ୍ରାର୍ଥୀଙ୍କ ଭୂମିକା ମଧ୍ୟ ଶେଷ ହୋଇଯାଏ ନାହିଁ। ସେମାନେ ଗଠନମୂଳକ ଭାବେ ଛାତ୍ରଙ୍କ ସମସ୍ୟା ଉଠାଇପାରନ୍ତି ଏବଂ କ୍ୟାମ୍ପସର ସୁସ୍ଥ ପରିବେଶ ଗଠନରେ ସହଯୋଗ କରିପାରନ୍ତି।ଛାତ୍ର ସଂସଦ ନିର୍ବାଚନ ତେଣୁ କେବଳ କିଏ ଜିତିଲା ଓ କିଏ ହାରିଲାର କାହାଣୀ ନୁହେଁ। ଏହା ହେଉଛି ଛାତ୍ରଙ୍କ ମଧ୍ୟରେ ଗଣତାନ୍ତ୍ରିକ ଚେତନା, ନେତୃତ୍ୱ ଓ ଦାୟିତ୍ୱବୋଧ ବିକାଶର ଏକ ପ୍ରକ୍ରିୟା। ଆଜିର ଛାତ୍ର ହିଁ ଆସନ୍ତାକାଲିର ନାଗରିକ, ପେଶାଜୀବୀ ଓ ନେତୃତ୍ୱ। ତେଣୁ କ୍ୟାମ୍ପସରେ ଯେଉଁ ନିର୍ବାଚନୀ ସଂସ୍କୃତି ଗଢ଼ିଉଠିବ, ତାହା ଭବିଷ୍ୟତର ସାମାଜିକ ଓ ଗଣତାନ୍ତ୍ରିକ ଜୀବନକୁ ମଧ୍ୟ ପ୍ରଭାବିତ କରିପାରେ। ଛାତ୍ର ସଂସଦ ନିର୍ବାଚନ ତେଣୁ ପ୍ରତିଯୋଗିତାର ମଞ୍ଚ ମାତ୍ର ନହୋଇ, ଦାୟିତ୍ୱଶୀଳ ନେତୃତ୍ୱ ଓ ସଚେତନ ନାଗରିକ ଗଢ଼ିବାର ଏକ ପ୍ରଥମ ପାଠଶାଳା ହେବା ଆବଶ୍ୟକ।
ଶିଶିର କୁମାର ପ୍ରଧାନ
ଛାତ୍ର,ଓଡ଼ିଆ ଭାଷା ସାହିତ୍ୟ ବିଭାଗ
ଓଡିଶା ରାଜ୍ୟ ମୁକ୍ତ ବିଶ୍ୱବିଦ୍ୟାଳୟ, ସମ୍ବଲପୁର
